نصائح للحفاظ على الفيتيس الأوتوماتيك

١ – لازم تبقى عارف إن العربية الأوتوماتيك مش هتدور وأنت على الـ D ولا هتدور وأنت على الـ R لأنه بـ إختصار الـ D و الـ R بيفصلوا كهربة عن المارش تماماّ وده مش هيخلى العربية تدور نهائى ولابد من النقل الى الوضع P أو R.

٢ – وأنت واقف فى إشارة حرك عصا الفيتيس الى الوضع N اللى هو وضع المور عشان تريح تروس الفتيس شوية ومتلفش على الفاضى وتبقى العربية عايزة تطلع وأنت ماسكها فرامل .

٣ – وأنت بتجيب الـ D أو الـ R خلى رجلك على الفرامل لأنك لو جبت حاجة من دول من غير فرامل هتلاقى العربية مشيت من غير ما تدوس بنزين لأن التروس أتحركت وحركت العربية معاها .

٤ – مينفعش تنقل من نقلة لـ نقلة والعربية ماشية حتى لو ماشية على سرعة 5 كم يعنى مينفعش مثلاّ وأنت بتطلع من ركنة وجايب الـ D والعربية لسة بتتحرك وبتطلع من الركنة تروح جايب الـ R عشان تعدل نفسك وتطلع!! أنت كدة بتدمر تروس الفتيس مع الوقت لأن لازم العربية تقف وتروح ناقل من الـ D للـ R والعكس .

٥ – نيجى للأوضاع التانية وهى الـ L و الـ 2 والـ 3 :- الـ L هو الغيار الأول وده الناس بتستخدمة فى المطالع الجامدة لأنه بيدى عزم شديد على سرعة قليلة بس خد بالك مينفعش تكون ماشى 60 ولا 80 وتروح جايب الـ L !! أنت كدة هتكسر الفتيس يعنى أخرك 30 بالكتير تجيب الـ L عليها . الـ 2 وده الغيار التانى والأول مع بعض بيسمح للعربية إنها تننقل ما بينهم . الـ 3 وده الغيار الأول والتانى والتالت فقط مش بتنقل للرابع .. ممكن وأنت ماشى على الـ L أو الـ 2 أو الـ 3 تجيب الـ D مرة واحدة عادى لأنه كدة كدة شغال على جميع النقلات ف أى وقت عادى .

٦ – نصيحة مهمة لو عايز تحافظ على فتيس عربيتك .. لوأنت بتركن أو بتقف بالعربية متنقلش الى الـ P مرة واحدة ومتشدش الهاند أو تجيب الـ P وتشد الهاند بعدها . الوقفة الصحيحة بالفتيس الأوتوماتيك هو إنك هتبطل العربية ثم تضغط فرامل وتجيب الـ N وترفع الهاند وبعد كدة تجيب الـ P لكن لما بتجيب الـ P وبعد كدة الهاند أنت كدة حملت العربية كلها بالموتور على ترس الفتيس ومع الوقت بيتاكل ويتكسر .