كتب – بيجاد سلامة
- ماذا اكتسبت من الفن بعد هذا الزمن الطويل وهذا العطاء المميز؟
يضحك.. خرجت بذبحة صدرية وثلاث جلطات وانسداد فى الشرايين وتضخم فى الكبد والقلب وبلاوى أخرى ومنغصات فى الحياة. الحياة مليئة بالمفارقات الغريبة فيها سعادة بؤس وشقاء وملذات.
- أذكر لنا ثلاثة أشياء بتكرهها فى الحياة؟
الكذب أولاً والنفاق (يا ساتر على النفاق) والخيانة خيانة صديق، لما الغريب يخونك دا بتسميه طعنة، ولكن لما الصديق بيخونك وبيطعنك دى بتوجع أكتر بتوجع لأنها بتفضل فى النفس تعذب القلب فهما دول الكذب والنفاق والغدر إللى بكرهم فى الدنيا.
- وثلاثة أشياء بتحبها؟
أحب الموسيقى أولاً وأنا بحب فنى ووطنى وبحب المرأة، مش عيب لما أحب المرأة واستمد من شفاه حلوة ولا عينين حلوة ولا جسم ممشوق وحى فنى. الحب فى نظرى شىء من الله.
- كم مرة حبيت أستاذ فريد؟
ما إنت عارف وهما عارفين (يضحك).
- طيب أعطينا بالعدد ومراح نقول أسماء؟
ربنا أوصى بالحب، ووضع لنا قلوب عشان نحب ونتحب، فأنا بوصى كل الناس إنهم يحبوا بعض وميكرهوش بعض لأن الكره دا بيسبب تعاسة فى القلب ومنغصات وضغائن ويكون فى جسد الإنسان شىء ما يدعوه للانتقام فربنا أوصانا بالحب.
- كمان ما جاوبتنى.. كم مرة حبيت فى حياتك؟
أنا أقول إن دى حاجات خاصة وبلاش عشان ما يفتكروش الجمهور إنى فاسق وفيه أشياء كتيرة الواحد يقدر يتعشق فيها منها الطبيعة وكمان الطبيخ يا سلام على الطبيخ وخصوصاً لو كانت (مجدرة) يضحك بقوة. الحب فيه حاجات كتير لذيذة وشاعرية وتبعث الراحة والطمأنينة للنفس وبتوحى للشعراء والملحنين أمثالى وإحنا بنقدم كل هذا للجماهير ولفننا، فأنا بآخد ابتسامة حلوة وأبلورها فى لحن جميل فأى غضاضة فى هذا الأمر.
- كم مرة إنت عشت فى حرمان وأنتجت شيئًا فى الحرمان؟
والله أنا أصعب حرمان عشته هو حرمانى من أختى أسمهان، يوم ما ماتت أسمهان يمكن نص حياتى انتهت لأن أسمهان كانت كل شىء فى حياتى. أنا وأسمهان كنا نحب بعض حب لا يمكن أن يتخيله إنسان، فهى كانت صديقتى وأختى وحبيبتى وكل شىء، والصوت إللى كنت با أديله أجمل ألحانى، وكان من السهل علىَّ لو فقدت عين من عينيا أو رجل أو إيد منى على أنى أفقد أسمهان، وياليت ما راحتش أسمهان.
ملقتش بعد أسمهان صوت يؤدى لى، مش صوت بس، صوت وشخصية لأن الفنان لازم يكون عنده صوت وشخصية. فيه كتير من الأصوات جميلة جداً فى الشرق لكن تنقصها الشخصية، والفنان إللى له شخصية بيوصل حتماً للناس بأى شكل كان، فأسمهان كان لديها شخصية جبارة وكانت فنانة جبارة وصوت عظيم، ومن يومها مالقتش صوت أحسن من أسمهان عشان كدا أنا ما بلحنش دلوقتى ومافيش فى هذا الوقت صوت أقدر أديه ألحانى إلا السيدة أم كلثوم.
