سلايدرفنون
أخر الأخبار

إسماعيل ياسين يحكى عن كواليس زواجه الثالث

كتب – بيجاد سلامة

استطاعت مجلة الكواكب فى الستينيات، أن تنفرد بحوار للنجم الراحل إسماعيل ياسين إسماعيل ياسين، وخلال الحوار كشف «ياسين» عن الكثير من أسرار حياته الشخصية، كما تحدث عن قصة ارتباطه بزوجته الثالثة والأخيرة «فوزية» وأُم ابنه الوحيد.

وأوضح أنه واجهته مشكلتان عندما تقدم لخطبتها وكان وقتها معروفًا ومشهورًا:

-الأولى أنه كان متزوجًا من قبل مرتين وتم الانفصال خلال 6 شهور فقط، ما أدى لانطباع «إنه راجل مش بتاع جواز ومايتعاشرش».

– أما المشكلة الثانية، فهى أن أهلها «مش هيوافقوا على ارتباطها بممثل»، ولكن لأنه أحبها منذ رؤيتها «خد الخطوة وراح يقابل والدتها اللى كانت شديدة وصعبة شوية».

وبطريقة إسماعيل ياسين اللطيفة حكى لها عن ظروفه، وإن الفن مش عيب ولا حرام وحكى عن أحلامه، وعن عدم التوفيق اللى صاحب الجوازتين الأولانيين.. فضل يتكلم يتكلم وأُمها فضلت تسمع منه لحد ما كمل كلامه للآخر ومفيش أى رد فعل منها، لدرجة إنه كرر جملة «حضرتك معايا؟» أكتر من 9 مرات.

ويتابع إسماعيل: الست ساكتة خالص ومش بتتكلم ومبرقة عينها فى وشى وملامحها اللى كلها تجاعيد مخوفانى، وبعد شوية سكت.

قالت له: أنا عن نفسى مش قابلاك ومش موافقة عليك ولا كلمة من اللى قلتها دخلت راسى بتعريفة.

إسماعيل ياسين وشه جاب ألوان وسألها: يعنى مفيش أى فرصة يا هانم؟

طنشت ترد على سؤاله وشاورت بإيدها على الحيطة اللى وراه وقالت له: معلش تعالى كده شوية.. زاح جسمه ناحية اليمين وهو لسه قاعد على الكرسى وبص على الحيطة الفاضية اللى بتشاور عليها ورجع بص على الست مش فاهم هى عايزة إيه.

قالت له: «لو لك نصيب فيها ربك قادر يخليك تخرق الحيطة دى وتيجى تاخدها غصب عنى».

سُمعة بيقول أنا مش فاكر إيه حصل بعد كده غير إنى خرجت من عندهم وكلى إحباط لكن يشاء ربنا إنى بعد أقل من شهر من الزيارة دى ورغم رفض والدتها وبدون ما نشعر لقيتنى أنا وفوزية قاعدين على كوشة واحدة وإن الأمور اتسهلت بشكل غريب.. غالباً إن نبوءة والدتها اتحققت ولأن فوزية من نصيبى ربنا قدرنى أخرق الحيطة.

موضوعات متعلقة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى