علق الفنان محمد محيى، على الانتقادات التى وجهت إليه من بعض جماهيره، وانقسام الجمهور، بسبب أغنيته “ورقة وقلم”، التى طرحها منذ أيام قليلة.
وقال إن كل فرد له ذوق، ورأيه على العين، وبالطبع الجمهور له كل الاحترام، وطالب بمنحه فرصة لتقديم تجربته كاملة.
وكتب محمد محيى، منشورا عبر جروب “بنحبك يا محيى” على فيسبوك، قال فيه “إخواتى وأعزائى فى الجروب، إن شاء الله لما ينزل السى دى هتفهموا أكتر بكتير من دلوقتى، وساعتها هتقارنوه بسى دى مظلوم وتقولوا مظلوم أحلى، اللى هو كان فى رأى وقته إنه لا يرتقى لسى دى قادر وتعملها، اللى هو وقته كان فى رأى إنه لا يرتقى لصورة ودمعة، وهكذا فى كل جديد يتقدم”.
وأضاف: “صدقونى متفهم جداً وأكيد كل واحد ليه ذوقه ورأيه على العين والراس وليهم كل الاحترام والتقدير عندى”.
وتابع: “أنا أستحمل وأستوعب ده حقكوا عليا، بحق محبتنا فى الله اللى مفيهاش أى مصلحة بكل تأكيد، وده أرقى وأطهر وأصفى أنواع المحبة، لكن الرجاء الوحيد ليا متختلفوش بسببى وأشوف تجاوز ليكم فى حق بعض، الاحترام والتقدير والفهم سمة جروبنا الطيب”.
وأردف محيى: “أخيرا أدونى فرصة أقدم تجربتى كاملة، وعيشها معايا لو تحب أو عيش مع القديم أو مع فنان تانى، ليك الحق تعبر كيفما تشاء، لكن كمان قدر مجهود وتعب وسهر وعطاء كل اللى بيحاربوا الزمن الصعب وبيضحوا عشان العمل يوصلك فى دقايق تسمعها وهما بيعيشوها سنين، أشكركم من كل قلبى أخواتى وأحبابى متفق ومختلف، وأتمنى أشوفكم بخير وسعادة ورضا.. والحمد لله”.
يذكر أن محيى، طرح كليب “ورقة وقلم” على يوتيوب، متذ أيام، ضمن أغانى ألبومه الجديد “بتاع زمان”، المقرر طرحه قريبا.
أغنية “ورقة وقلم” من كلمات إيهاب عبده، ألحان مصطفى عوض، توزيع رفيق عاكف، إخراج كامبا.
