كتب – إيهاب ناجى
نشرت الفنانة حلا شيحة، منشورا، عبر حسابها الرسمى على موقع «إنستجرام»، تنتقد فيه مشاهدها الرومانسية التى جمعتها بالفنان تامر حسنى، من خلال فيلم «مش أنا».
وقالت: «أنا اتفاجئت جدا بنزول كليب يجمع فيه مشاهد متفرقة من الفيلم وفى أيام ذى الحجة أيام مباركة، خصوصاً بعد آخر بوست نزلته ووضحت فيه أنا إيه».
وأضافت حلا شيحة: «واتفاجئت أكتر خصوصًا بعد وعد تامر حسنى ليا وتأكيده إنه حيحترم رغبتى وبعض الطلبات اللى طلبتها منه بكل احترام وود الصيف اللى فات، وأكدلى إنه حيحترم رغبتى».
وتابعت حلا شيحة: «إحنا يمكن نجحنا بمقاييس الدنيا بس صدقونى بمقاييس ربنا إحنا لم ولن ننجح.. أنا عارفة ومتأكدة إن زملائى جواهم خير بس للأسف فتنة الشهرة والنجاح مش بتخلينا نشوف ونقيس الأمور صح».
وعن طرح الكليب المجمع من أحداث فيلم «مش أنا»، الذى تظهر فيه حلا مع تامر حسنى، قالت: «الكليب ده ميرضيش ربنا وانا عيطت لأنى شفت نفسى فى المشاهد دى.. دى كانت زلة نتيجة ظروف مريت بيها و كلنا بنغلط ولازم نغلط علشان إحنا بشر بس المصيبة إننا بنغفل و بننسى».
وأضافت: «أنا مش حتكسف من حد أنا توبت من المشاهد دى وهى لا تصح وانا غلطت وبصلح وأهم حاجة إن ربنا يرضى عنى لأن فى الآخر ده اللى حينفعنا مش الشهرة ولا النجاح، لا هو مش نجاح أصلا علشان النجاح الحقيقى حاجة تانية خالص إحنا أغلبنا ناسينها إلا القليلين منا» .
وتابعت: «الفن لو بيخلينا نبعد عن منهج ربنا ومنبقاش قدوة لولادنا يبقى باطل وميبقاش فن،
إحنا كلنا عندنا امتحان فى الدنيا دى».
حلا شيحة توجه رسالة لتامر حسنى
ووجهت حلا شيحة رسالة للفنان تامر حسنى، قائلة: «حابة أفكرك بالفيديو ده يا تامر اللى قولت فيه أنا مش بتمنى أموت وأنا مطرب أنا دايما خايف من كده.. كلام أكيد قولته فى لحظة صدق جواك وجوانا كلنا»،
وتابعت: «شوفه تانى يمكن يفكرك إن جواك أكيد فى صراع وانا و كلنا.. كلنا بنغلط بس المهم فى الآخر نتدارك الغلط و نصلح».
واختتمت الفنانة منشورها بذكر آية من القرآن {إِلَّا مَن تَابَ وَءَامَنَ وَعَمِلَ عَمَلࣰا صَـٰلِحࣰا فَأُو۟لَـٰۤىِٕكَ یُبَدِّلُ ٱللَّهُ سَیِّـَٔاتِهِمۡ حَسَنَـٰتࣲۗ وَكَانَ ٱللَّهُ غَفُورࣰا رَّحِیمࣰا}.. الله على كلام الله وجماله يا سلام لو أصواتنا ومواهبنا كلها نستعملها فى الخير عشان يبقى فن بجد.
