كتب – إيهاب ناجى
ما زال مسلسل الشد والجذب بين كل من المطرب رضا البحراوى، ومطرب المهرجانات حسن شاكوش، مستمرا، حيث وقعت مشادات ومناوشات بين كل منهما، يوم الجمعة الماضى، فى حفل أحياه الاثنان بأحد الملاهى الليلية بالساحل الشمالى.
«النيل24» يكشف التفاصيل الكاملة لخناقة شاكوش والبحراوى عبر السوشيال ميديا.. البداية كانت مع حسن شاكوش عندما صعد على المسرح، وكانت فرقة رضا البحراوى متواجدة على المسرح، حيث قرر شاكوش عدم إكمال فقرته الغنائية، إلا بعد مغادرة فرقة البحراوى المسرح: لأن «كده كده بيغنى بلاى باك»، وبالفعل تم تنفيذ طلبه وسط استياء من أعضاء الفرقة.
ثم عادت المناوشات مرة أخرى، حينما قررت فرقة رضا البحراوى الصعود على المسرح للمرة الثانية قبل نزول شاكوش وانتهاء فقرته، ما أغضب شاكوش ووجه لهم إشارات خارجة وبذيئة، فردت عليه فرقة رضا البحراوى، ما استدعى دخول حمو بيكا الذى كان متواجدا وأنهى الأمر قبل حدوث كارثة.
وحينما وصل البحراوى الحفل وعلم بما حدث، وجه التحية لفرقته الموسيقية وبدأ فى الغناء وبعدها أوقف الغناء وظل ينادى على شاكوش قائلا «شاكوش فين.. مشى.. كنت عايزه والله.. نفسى فيه بس للأسف خد بعضه وجرى.. عايزه يدعى لحمو بيكا».
رد حسن شاكوش على رضا البحراوى
وعندما علم شاكوش بما حدث من البحراوى فى الحفل، فتح بثا مباشرا على صفحته على موقع التواصل الاجتماعى «فيسبوك» وظهر يسخر من كلام رضا البحراوي، حيث قال: «أنا هربان يا جماعة هربان أهو وفى شرم الشيخ علشان عندى حفلة إن شاء الله».
وأضاف فى البث المباشر قائلا: «أغنية واحدة من بتوعى بتاريخك كله.. أنا بطلع أغنى شغلى.. لكن مش باخد إيفيهات من على التكاتك والميكروباصات.. اجتهد وهات.. فكر من دماغك وبلاش تعلق همومك على شماعة غيرك.. عمرى ما سمعت ليك أغنية فى الشارع مكسرة الدنيا، وأنت عارف إنك مش بتصرف على الأغانى عشان عارف إن أخرك الأغانى اللايف».
وأضاف: «الغلط راكبك من ساسك لراسك، ولو على السب أنت اللى سبيت وجبت سيرتى بالاسم، أنت اللى قولت (فين حسن هو هرب أنا نفسى فيه)، أما أنا فذكرت إفيه من فيلم (حين ميسرة) والجميع فهم الإيفيه، وما غلطتش فى أمك وأبوك، جزمتهم فوق راسى عشان فى مقام أهلى».
رد رضا البحراوى على حسن شاكوش
ورد المطرب الشعبى رضا البحراوى، على فيديو حسن شاكوش، فى بث مباشر عبر صفحته الرسمية بموقع «فيسبوك»، قائلا: «حسن شاكوش طالع يتكلم دلوقتى يقول أنا عندى كام مليار واليوتيوب وأنت ملكش أغانى، طيب أنا من سنة 2000 يا حسن، وكنت عامل شريط صغير مع عماد محرم، وقايل أغانى أنت متعرفش تقولها، 2005 عملت أغنية مع عبدالسلام اللى كسرت العالم، وشرف لى إن الفنان حكيم غناها».
وتابع البحراوى «أنا محترم وكان عندى استعداد أرد عليك، وأنا مش هينفع أشتمك أو أقول لفظ غلط، علشان جمهورى اللى بيحبنى، أنت بقى مش محترم دى لنفسك».
وأضاف: «وعملت أغانى مسلسلات وتترات ودراما، حاجات ماتعرفش أنت تعملها، وعملتها لوحدى، أنت بتقول أنك نجم منرفز نفسك ليه أوى كده، شاغل دماغك بيا ليه، (بنت الجيران) مش نجاحك لوحدك لأن معاك عمر كمال، و(فودكا) كان معك حمو بيكا، مجبتش سيرتهم مع إنهم من أن أسباب النجاح، عشان أنت مش سالك وأنا مش شاغل بالى بيك أصلا، أنا قاعد مع الحمام فى غيتى، أنت نجاحك بحد تانى مش لوحدك وبرغم ذلك مذكرتش حد فيهم».
وأردف: «بغنى لناس متعرفش تغنى لهم، أنا بطلع أغنى حى، مبحطش فلاشة وأحرك شفايفى بس، وأنا معايا 40 واحد فى الفرقة، أنت عملت 3 أغانى يوتيوب يعنى لو قعدت فى بيتك مع الـ3 أغانى دول هتصرف عادى، ولكن متعرفش تغنى تتر بداية أو نهاية مسلسل أو تغنى دراما، بشوفك بس بفلاشة».
فهل ستنتهى الخلافات على ذلك أم سيكون لكل منهما رأى آخر وتستمر المشادات والمناوشات بينهما.. هذا ما ستجسي عليه الأيام المقبلة.
موضوعات متعلقة
أيمن بهجت قمر يطالب هانى شاكر بالتدخل فى أزمة شاكوش
